வார்த்தைகளின் விளிம்பில்

லண்டன் கலை நிகழ்ச்சிகள் - மேற்கத்திய சாஸ்த்ரிய இசை.

காண்ட்ராக்ட் முடிந்த ஒரு இடைவேளைக்குப் பிறகு புது வேலைக்குப் போகத் தொடங்கிவிட்டேன். பழைய பிராஜக்டையே சரியா முடிக்கலை திரும்ப வந்து முடிச்சிட்டுப் போ எனக் கூப்பிட்டதால் அங்கேயே மறுபடியும் அடைக்கலம். போன மாதம் திடீரென காண்ட்ராக்ட் முடிந்து வேலை போனபோது, அடடா என்னடா இது புது அலுவலகத்தைச் சுற்றி பல முக்கியமான இடங்கள் இருக்கே அதையெல்லாம் பார்க்கலியே என வந்த எரிச்சலை இப்போது தவணை முறையில் சரி செய்துவருகிறேன். நான் வேலை செய்யும் செண்ட்ரல் லண்டன் அலுவலகத்தைச் சுற்றி பல கலை நிகழ்ச்சிகள் நடந்து வருகின்றன. இந்த வாரம் முதல் நேரம் கிடைக்கும்போது ஒவ்வொன்றாகப் பார்க்க உத்தேசம்.

1. சார்லஸ் டிக்கன்ஸின் இருநூறாவது ஆண்டு பிறந்த நாள் விழாவை முன்னிட்டு, லண்டனின் பல இடங்களில் அவரது படைப்புகள், வாழ்க்கைப் பற்றிய கண்காட்சிகள் நடக்கின்றன. அவற்றில் ஒன்றாவது பார்த்துவிடவேண்டும் என்ற எண்ணம் இருக்கிறது. என் அலுவலகம் இருக்கும் ஹால்பேர்ன் பகுதியில் தான் The Old Curiosity Shop எனும் கடை இருக்கிறது. குறைந்தபட்சம் அதையாவது பார்த்துவிடவேண்டும்.

2. லண்டன் நகரின் இசை விழா கடந்த வாரம் முதல் தொடங்கி விட்டது. பல தேவாலையங்களில் மதியம் ஒரு மணி முதல் இரண்டு மணி வரை ஏதேனும் மேற்கத்திய சாஸ்த்ரிய சங்கீத நிகழ்வு நடைபெறும். சில சமயம் ஜாஸ் இசையும் உண்டு. அனுமதி இலவசம். இன்று ஷூமேன், பீத்தாவனின் நிகழ்வுக்காக புனித ஆன் தேவாலயத்துக்குச் சென்று வந்தேன்.

3. மற்ற இசை நிகழ்வுகள் பற்றிய அட்டவணையை இங்கு பார்க்கலாம்.

4. இவ்வருடம் நடக்கயிருக்கும் ஒலிம்பிக்ஸுக்காக லண்டனின் ஸ்ட்ராட்போர்ட் எனும் இடத்தில் பெரிய விளையாட்டு அரங்கம் தொடங்கப்பட்டுள்ளது. விளையாட்டு நடக்கும் நாட்களுக்குத் தான் டிக்கெட் கிடைக்கவில்லை, இப்போது காலியாக இருக்கும் மைதானத்தையும் அதைச் சுற்றி கட்டப்பட்டிருக்கும் புது டவுன்ஷிப்பையும் பார்த்து வரலாமே!

5. சுமார் நூற்றி ஐம்பது வருடங்களுக்கு முன் கட்டப்பட்ட லண்டன் தரையடி ரயில் பாதைகளைப் பற்றிய மிக அற்புதமான கண்காட்சி பிரிட்டிஷ் நூலகத்தில் நடந்து கொண்டிருப்பதாகத் தெரிகிறது. லண்டன் தரைக்குக் கீழே இயங்கும் 30 சதவிகித நகரத்தில், பாரீஸின் காடகோம்ஸ் போல பல பூதாகரமான நிழல் பகுதிகள் இருந்தனவாம். அவற்றைப் பற்றி இந்தக் கண்காட்சியில் தெரிந்துகொள்ளலாம். அனுமதி இலவசம்.

6. இரண்டாம் உலகப் போரில் பயன்படுத்தப்பட்ட போர் கப்பல்கள் தேம்ஸ் நதியில் இவ்வருடம் முழுவதும் பார்வைக்காக வைக்கப்பட்டிருக்குமாம். அதை மட்டும் ஏன் விட்டுவைக்க வேண்டும்?

*
இன்றைய இசை நிகழ்ச்சி பற்றி ஓரிரு வார்த்தைகள்.

புனித ஆன் தேவாலயம் உலகப் புகழ் பெற்ற புனித பால் தேவாலயத்துக்கு மிக அருகே உள்ளது. இங்கிலாந்திலேயே இரண்டாவது பெரிய தேவாலயமான புனித பால் அருகே சிறு கீற்று போலிருக்கிறது புனித ஆன் தேவாலயம். வாடிகனின் சர்வாதிகாரத்தை எதிர்த்து அவற்றின் கொள்கைகளுக்கு எதிராகத் தொடங்கப்பட்ட பிராட்டஸ்டண்ட் அமைப்பின் பிதா மார்டின் லூதர் வழி வந்த ஆங்கியேல தேவாலயங்கள் லூதரன் எனப் பெயர் கொண்டன. வாடிகன் நகரப் போப்பைத் தலைமையாக ஏற்றுக்கொள்ளாத இவர்களுக்கு ஆங்கிலேய லூதரன் அமைப்பு தான் இறை கொள்கைகளைத் தீர்மானிக்கிறது. இசைக் கலைஞர் மார்டின் லூதர் தொடங்கிய அமைப்பாததால் இந்த தேவாலயங்களில் இசை மிக முக்கியமான அங்கம் வகிக்கிறது.

குறிப்பாக, புனித ஆன் தேவாலயத்தில் இசைக்காக ஒரு அமைப்பு இயங்குகிறது. மேற்கத்திய சாஸ்த்ரிய சங்கீதம் மட்டுமல்லாது ஜாஸ் போன்ற வகைகளையும் இங்கு இசைக்கிறார்கள். ஆலயத்தின் அமைப்பும் இசை நிகழ்வுகளுக்கு ஏற்றார்போல விசாலமாக இருப்பதோடு மட்டுமல்லாது, பெரிய ஆர்கன் அமைப்புகளுடன், வெளிப்புற சத்தம் உள் நுழையாதபடியான கட்டிட அமைப்பும் கொண்டிருக்கிறது. எதிரொலி இசைக்குத் தடையாகக் கூடாது என்பதால் சில தேவாலயங்களில் ஆர்கன் பைப்புகள் விஷேசமான வடிவில் இருக்கும். மேற்கோபுரங்களும் அதற்கேற்றார்போல வடிவமைக்கப்பட்டிருக்கும். பரோக் அமைப்பின் கட்டிட வடிவமைப்பில் இவ்வகை இலக்கணங்கள் சாத்தியம். அப்படிப்பட்ட அமைப்புகளை இங்கும் பார்க்க முடிந்தது.மற்றபடி பெரிய அலங்காரங்களோ பிரதான காதிக் வகை வளைவுகளோ இங்கில்லை.

இந்த முறை லண்டனில் நடக்கும் இவ்வகை மதிய இசை நிகழ்ச்சிகள் மிக விரிவான இசைப்பாடல்களைக் கொண்டிருக்கவில்லை. கிட்டத்தட்ட அனைத்தும் மூவகை இசைக் கருவிகளைக் கொண்டு அமைக்கும் ட்ரியோ அல்லது ஐவகை வாத்தியங்களாலான குவிண்டட் பாடல்கள் மட்டுமே. சிறு அறைக்குள் நடத்திவிடலாம் என்பதால் இவற்றை சேம்பர் இசை எனப் பகுத்துள்ளனர். குறைவான இசைக்கருவிகளைக் கொண்டு சிம்பொனி போன்ற அளவில் பெரிய இசையை நிகழ்த்திக்காட்ட முடியாது.

இன்று நடந்த இசை நிகழ்ச்சி - பியானோ ட்ரையோ. மூன்று வாத்தியங்களில் பிரதானமாக அமைந்திருக்கும் கருவியைக் கொண்டு தான் ட்ரியோவின் பெயர் வழங்கப்படும். இன்றைய நிகழ்ச்சியில் ராபர்ட் ஷுமனின் Fantasiestücke Op 88வும், பீத்தாவனின் Archduke ட்ரையோவும் இடம்பெற்றன. கீழுள்ள காணொளியில் அவற்றைக் கேட்கலாம். அவர்கள் இருவரும் பியானோ இசைப்பதில் வல்லுனர்கள். அதனாலேயே அவர்களது ட்ரையோ இசையில் பியானோ பிரதான பங்கு வகிக்கும்.

மேற்கத்திய சாஸ்த்ரிய இசையில் மிக முக்கிய்மாக கவனிக்க வேண்டியது - கருவிகள் நிகழ்த்தும் ஸ்ருதி மாறுதல்களும், தாள வேறுபாடுகளும் தான்.

ஒரு கருவி தொடங்கிய சில நொடிகளில் அடுத்த இரண்டு கருவியும் அதே இசையைத் தொடங்குவதால் கிடைக்கும் கால இடைவெளி சரியாக இருந்தால் தான் ஹார்மொனி எனச் சொல்லப்படும் ஒத்திசைவு சாத்தியம். சில சமயம் ஒரு கருவி ஏறுமுகமாக வாசிக்கும்போது மற்றொன்று கீழிறங்கும் - அப்போது அவை இரண்டும் சில புள்ளிகளில் சந்தித்துக்கொள்ளும். அவற்றை contrapuntal புள்ளிகள் என அழைப்பர். கேட்க இனிமையாக இருக்கும் இசையில் இவ்வகை ஒத்திசைவு மிக முக்கியமாகும்.

கீழுள்ள காணொளியின் தொடக்கத்தில் கவனியுங்கள். செல்லோ ஏறுமுகமாகச் செல்லும்போது, அதே இசையை வயலின் இறங்குமாக அமைந்திருக்கிறது. அடுத்தடுத்து வருவதால் மிக ரம்மியமான மெலடி ஊடல் போல கொஞ்சல் சிணுங்கல் கோபித்தல் போல உருவாகிறது.
 

அதே போல, கீழுள்ள ஷூமன்ன் ட்ரியோவின் கடைசிப் பகுதியை கவனியுங்கள்.

 

எல்லா இசைக் கருவிகளும் ஒரே நேரத்தில் மிலிட்டரி இசை போல தொம் தொம் எனத் தொடங்கினாலும், மெல்ல ஒவ்வொன்றும் பிரிந்து தனியாவர்த்தனம் செய்யத் தொடங்குகின்றன. அதற்குப் பிறகு அவை அனைத்தும் எப்போதும் இணையும் என நமக்கு டென்ஷன் தொடங்கிவிடும். இணைந்தால் தானே இனிமை! ஒரு முறை அதன் சுவையை அனுபவித்த நமக்கு அந்த ஒத்திசைவு எப்போது வரும் என ஏக்கம் உருவாகிவிடும். அதற்காகக் காத்திருக்கத் தொடங்குவோம். ஆனால் பாரபட்சமில்லாத இசையமைப்பளரோ தனித் தனி இசையை வெவ்வேறு திசைகளில் அனுப்பிவிட்டாரே. ஆதார சுருதியிலிருந்து விரிவடைந்து வயலின் வேறெங்கோ பயணிக்கும்போது, செல்லோ கீழ் ஸ்தாயியில் வயலினுக்கு எதிர்புரமாக அல்லவா பயணிக்கிறது. வயலின் ஒரு நோட்ஸ் வரிசையை வாசிக்கும்போது, பியானோ வேறொன்றை இசைக்கிறது. ஆனால் ஆச்சர்யமாக, ஹோம் நோட் எனச் சொல்லப்படும் ஆதார ஸ்ருதியை வந்தடையும்போது எல்லாகருவிகளும் அதே நேரத்தில் அங்கு வந்து இணைந்துகொள்ளும். சில சமயங்களில் ஒரு கருவி முன்னணியாகவும் மற்றவை அதற்கு ஒத்தாகவும் அமையும். அப்படிப்பட்ட கருவிகளை accompaniment என வழங்குவர்.

கர்னாடக இசையில் ராகத்தின் பல விஷேசப் பிரயோகங்களை பலவிதத்தில் பாட முடிவது போல இங்கும் ஒவ்வொரு இசைக்கருவியும் தத்தம் பயணத்தில் எங்கெங்கோ சஞ்சாரிக்கும். B Major என ஒரு இசையைச் சொல்லும்போது அதன் ஆதார ஸ்ருதியைத் தான் B Major எனும் கார்டைக் கொண்டு குறிப்பிடுகிறார்கள். ஆனால், அந்த B Major வந்தடைய தான் எத்தனை மேஜர், மைனர் வழிகள்! ஒவ்வொன்றும் ஒவ்வொரு சாத்தியக்கூறு. இசையமைப்பாளன் ஒன்றைத் தேர்ந்தெடுக்கும்போது எண்ணிலடங்கா சாத்தியங்களை விட்டுவிடுகிறான். அவையெல்லாம் சரியாக அமையும் எனச் சொல்லமுடியாது. முடிவில் எல்லாம் இணைந்துகொள்ளும் போது கேட்பவர்கள் அடையும் அமைதியைத் (அப்பாடா,முடிஞ்சுதுப்பா) தான் returning Home என ஆதாரச் சுருதியைப் பற்றி குறிப்பிடுவார்கள். வீட்டுக்கு திரும்பினால் எல்லாம் சுகமே என நினைத்திருக்கும் அப்பாவி ஸ்வரங்கள்.

கீழே கேளுங்கள் - ஆரம்பத்தில் ஒலித்த மார்ச்பாஸ்ட் ஒலி பாதியில் (3:14) திரும்பவும் ஆரம்பத்துவிட்டது. அதாவது ஒரு சுழற்சி முடிந்துவிட்டது என அர்த்தம். ஆனால் அதற்குப் பிறகு ஒவ்வொரு கருவியும் வேறு வகையான நோட்ஸ்களை வாசிக்கும். இதைத் தான் variations என அழைப்பர். அதாவது ஆரம்ப பகுதியில் வந்த அதே நோட்ஸ்களைக் கொண்டு அவற்றைச் சற்றே மாற்றியமைத்து வேற வித இசையை வாசிப்பார்கள். இதிலிருக்கும் சாத்தியங்கள் எண்ணிலடங்காதவை.

  

மாஹ்லர் சிம்பனி-6

இன்றிரவு சவுத் பேங்க் சென்டரில் மாஹ்லரின் சிம்பனி-6 கேட்கும் வாய்ப்பு கிடைத்தது. இசைத்தகடுகளில் கேட்பதை விட அரங்கத்தில் வாசிக்கப்படும் இசை மிக வித்தியாசமான அனுபவமாக எனக்கு இருந்துள்ளது. அதனால் முடிந்தவரை அரங்குக்குச் சென்று கேட்பதை வழக்கமாகக் கொண்டுள்ளேன். சவுத் பேங்க் செண்டரில் மாஹ்லரின் நூற்றாண்டு விழா நடப்பதால் எங்கெங்கும் கட்-அவுட் வைக்காத குறை. தேம்ஸ் நதிக் கரையை ஒட்டி இருக்கும் சவுத் பேங்க், நான் ஐந்து மணிக்கு நுழையும் போது விழாக் கோலத்தில் குதூகலமாக இருந்தது.

தேம்ஸ் நதியில் நிறுத்தப்பட்டிருந்த இசைப் படகுகள், கரையை ஒட்டி அமைந்திருந்த ’பார்கள்’, ஆங்காங்கு வாத்தியங்களை வாசித்துக்கொண்டிருந்த பஸ்கர்ஸ், இசைக்குக் கட்டுப்பட்டு ஆடிக்கொண்டிருந்த தண்ணீர் ஜாலங்கள் என சவுத் பேங்கின் வாசல் திருவிழா போலக் காட்சியளித்தது. மாஹ்லரின் சீசன் சில மாதங்களாக நடந்து கொண்டிருப்பது தெரிந்தாலும், இன்றுதான் அங்கு செல்ல வாய்ப்பு கிடைத்தது. சிம்பனி இசை நிகழ்ச்சி ஏழரை மணிக்குத்தான் தொடங்கும் என்பதால் அதுவரை அங்கிருந்த கட்டிடங்களைச் சுத்திக்கொண்டிருந்தேன்.

பத்து வருடங்களுக்கு மேலாக, லண்டனின் கலை கலாசார சங்கமமாக சவுத் பேங்க் செண்டர் உள்ளது. 1950களில் இருந்த பிரான்ஸின் லெஃப்ட் பேங்க் கலாச்சார மையமாக இருந்தது போல் இப்போது சவுத் பேங்க் பகுதி மாறி வருவதாக ஊடகங்கள் தெரிவிக்கின்றன. இலக்கிய சந்தை, பிரபல எழுத்தாளர்களின் புத்தக வெளியீடு, ஓவியக் கலைஞர்களின் நவீன ஓவியப் பொருட்காட்சிகள், செவ்வியல் மட்டுமல்லாது ராப், ராய் போன்ற நவீன உலக இசை அரங்கேற்றம் என கலை உலகின் சகலத்தின் அச்சாணி இங்கு தான் சுழன்றுகொண்டிருக்கிறது.

அரங்குக்குள் நுழைந்தால் ஒரு கணிப்பொறி நிறுவனமோ, ரோபோக்களின் தொழிற்சாலையோ என பிரமிக்கும் வண்ணம் நவீன தொழில்நுட்பத்தின் சகலத்தையும் பயன்படுத்தியுள்ளது தெரிகிறது; ரத்தம் வருமளவு கட்டிங் எட்ஜ் ப்ளீடிங் எட்ஜாக காட்சியளிக்கிறது. அரங்குக்குள் தொலைந்து போனால், அங்கிருக்கும் ‘கியோஸ்க்’ எனப்படும் கருவியில் கேட்கலாம்/தட்டச்சு செய்து கண்டுபிடிக்கலாம். உச்சரிப்பைப் புரிந்து கொள்ள கொஞ்சம் சிரமப் பட்டாலும், நம் பட்லர் இங்கிலீஷை இரண்டொரு முயற்சிக்குப் பிறகு சரியாகக் கண்டுபிடித்துவிடுகிறது. ஒரு முறை பதிவு செய்துவிட்டால், கவலை தீர்ந்தது. ஐ கேன் வாக் இங்கிலீஷ், டாக் இங்கீஷ் தான் ! சமத்து!

அதே போல், முன் தினம் நடந்த நிகழ்வுகளை சுருக்கமான காணொளியாக ஆங்காங்கு ஓடவிடுகிறார்கள். நமக்கு வேண்டியவற்றை நம் ஐபாடில் தரவிறக்கம் செய்துகொள்ளலாம். முழு நிகழ்ச்சியையும் கட்டணம் கொடுத்து வாங்கிக்கொள்ளலாம். சில குறிப்பிட்ட நிகழ்ச்சிகள் முடிந்தவுடனேயே இச்சேவையைப் பயன்படுத்திக்கொள்ளலாம்.

மெல்ல என் கால்கள் ஓவிய கூடாரத்துக்குள் நுழைந்தன. சவுத் பேங்கிலிருந்து பதினைந்து நிமிட நடையில் டேட் நவீன ஓவிய காட்சியகம் (Tate Gallery) உள்ளது. பாரிஸ் லூவருக்குப் பிறகு மிகவும் பிரசித்தி பெற்ற இந்த டேட் காலரியும் தேம்ஸ் நதிக்கரையில் உள்ளது. இறை தூதர் பாலின் தேவாலையத்திலிருந்து மில்லனியம் பிரிட்ஜ் எனப்படும் பாலத்தின் வழி தேம்ஸைக் கடந்தால் டேட் காலரி வாசலில் முட்டி நிற்போம். காலரியின் கதவுக்கு எதிரேயே ஒரு சந்து போகிறது. அதில் நுழைந்து மறு பக்கம் வெளியே வந்தால் டேட் நவீன ஓவியக்கூடம் இருக்கிறது. இவ்வளவு அருகருகே பல கலைக் கூடங்கள் இருப்பதால் சவுத் பேங்குக்கு மவுசு ஜாஸ்தி. 2000இல் மில்லினியம் பிரிட்ஜ் கட்டப்பட்ட சில நாட்களிலேயே ஊஞ்சலாடத் தொடங்கியது. அதைப் பிடித்து நிறுத்தி அஸ்திவாரத்தை பலப்படுத்தி சில மாதங்களில் மீண்டும் திறந்தார்கள். இன்று வரை மூச்! ஒரு ஆட்டமில்லை. சில வருடங்களுக்கு முன் அங்கு முதல் முறை சென்றபோதே எனக்குப் பிரச்சனை புரிந்துவிட்டது. டேட் காலரி வாசலைத் திறந்தவுடன் பிரிட்ஜ் , அது முடிந்தவுடன் நீண்ட தெரு! தெருவுக்கு நேரே கற்பூர வாசனையுடன் கமகமவென ஒரு சின்ன பிள்ளையார் சிலை வைக்ககூடவா யாருக்கும் தோன்றவில்லை?

டேட் அளவுக்கு இல்லாவிட்டாலும் சவுத் பேங்கின் ஓவியக் கூடம் தற்கால ஓவியங்களின் தொகுப்பாக உள்ளது. அனிஷ் கபூர், ரெளலியா போன்ற பிரபல ஓவியர்களின் கண்காட்சியும் இங்கு நடத்தப்படுகின்றன. இங்கிருக்கும் ஓவியக்கூடத்தில் ரவுண்ட் கட்டி பல ஓவியர்கள் சுற்றிக்கொண்டேயிருக்கிறார்கள். நான் சென்ற போது ஏதோ ஒரு புரியாத மொழியில் மிக மிக நவ-நவீன ஓவியங்கள் வைக்கப்பட்டிருப்பதாக அறிவிப்பு மின்னிக்கொண்டிருந்தது. நான் புரியாமல் வலம் வருவதை பார்த்து ஓவியம் வரைவதையே குறுந்தாடி ஓவியர் நிறுத்திவிடக்கூடாதே என்ற நல்லெண்ணத்தில் உள்ளே நுழையவில்லை. இருபது பவுண்ட் தப்பித்தது.

நேரம் ஏழேகால் ஆனபோது ராயல் ஃபெஸ்டிவல் அரங்குக்குச் சென்றுவிட்டேன். ஒரு நிமிடம் தாமதாக வந்தால் கூட இடைவேளை வரை உள்ளே நுழைய முடியாது. மாஹ்லரே வந்தால் கூட இது தான் கதி. உள்ளே நுழைந்து என் இருக்கையில் உட்கார்ந்தேன். இந்த அரங்கத்துக்குப் பல முறை வந்திருக்கிறேன். பண்டிட் ரவிஷங்கரின் சிம்பனி அரங்கேற்றமும் இங்கு தான் நடந்தது. ஐரோப்பாவில் மிகத் துல்லியமான ஒலி அமைப்பு கொண்ட அரங்கம் என பிபிஸி மியூசிக், கிராமஃபோன் போன்ற இசை இதழ்கள் உத்திரவாதம் அளித்திருந்தன. ஒலி அமைப்புக்குத் தக்கவாறு அமைந்த அரங்கு, அதிக எதிரொலி இல்லாத சுவர்கள் என இசைக்கு உறுதுணையாக கட்டிடம்.

சரியாக ஏழரை மணிக்கு மாஹ்லரின் சிம்பனி-6 தொடங்கியது. ஆரம்பித்த சில நிமிடங்களிலேயே சிம்பனி இசை ஆட்கொண்டுவிட்டது. அதற்கு இசை ஒரு காரணம் என்றால், ரசிகர்களின் அமைதி மற்றொரு காரணம். அதைத் தவிர ஆறரை மணி அளவில் மாஹ்லரின் சிம்பனி பற்றி அரைமணி நேரம் பிரசங்கம் இதே அரங்கில் நிகழ்ந்திருந்தது. அதை கவனிக்காமல் ஓவியக் கூடத்தில் பேமாரம் போல் சுற்றியிருக்கிறேன். கிட்டத்தட்ட சிம்பனி கேட்க வரும் அனைவரும் இந்த முன் பிரசங்கத்தைத் தவற விடமாட்டார்கள். இசைக்கலைஞர்களின் அறிமுகம், அவர்களது பங்கு, வாத்தியக்கருவிகளின் ரோல் என்னென்ன போன்றவற்றை இசை ஒருங்கிணைப்பாளர் விவரிப்பார். இதனால் சிம்பனிக்கு வரும் பெரும்பான்மையானவர்கள் இசை நுணுக்கங்கள் புரிந்த ’ஆஹா,பேஷ், பலே!’போடும் மிகத் தீவிர ரசிகராக இருப்பார். அந்த இரண்டு மணிநேரங்கள் இசையைத் தவிர எதுவும் அவருக்குத் தோன்றாது. பொதுவாகவே இப்படிப்பட்ட கூட்டம் அமைந்தால் இசையை ரசிக்க சரியான மனநிலை தானாகவே அமைந்துவிடும்.

டிராஜிக் என்றழைக்கப்படும் இச்சிம்பனி பெயருக்கேற்றார்போல் மிக இருண்மையான இசை வடிவங்களைக் கொண்டது. கொண்டாட்டம் என்றால் கிலோ என்ன விலை எனக்கேட்பது மாஹ்லருக்கு ஒன்றும் புதிதில்லை என்றாலும், இதை மாஹ்லரின் darkest என விமர்சகர்கள் வருணிக்கிறார்கள். இசையைக் கேட்கும்போது நமக்கும் அந்த எண்ணமே தோன்றும். மிக உக்கிரமான கிளாரினெட்,ஓபோ, வயலின் இசைத் துண்டுகளுக்கிடையே ஒலிக்கும் மிலிட்டரி டிரம்ஸ் யுத்த காலத்தையோ பஞ்ச காலத்தையோ நமக்கு நினைவூட்டும். மாஹ்லரின் பல இசைத் துணுக்குகளை சார்லி சாப்ளின் படங்களின் பின்னணியாக பயன்படுத்தியுள்ளனர். சாப்ளினின் ஆவாரா சோகத்துக்கு இதை விட சரியான இசை அமைந்திருக்காது என்றே தோன்றுகிறது.

வயலின், கிளாரினெட் வாத்தியங்கள் நிறுத்தி மூச்சு வாங்கிக்கொள்ளும்போதெல்லாம் மெல்லிய ஓபோ/புல்லாங்குழல் இசை சூழ்நிலையைக் கலைத்துப் போட்டுவிடுகிறது. மிக bleak இசையாக நம் சகஜ எண்ணத்தைக் குலைத்து விடுகிறது. பாதி கேட்கும்போதே இசை நிகழ்ச்சி முடிந்து எப்போது அந்த இறுக்கம் குறையும் என்ற தவிதவிக்கும் எண்ணம் உருவாகிவிடும்.

நம் எதிரிக்கும் வரக்கூடாத கொடுமையான சோகம் யாருக்கோ வந்துவிட்டது போன்ற ஒலி மயக்கம். லியானார்ட் பெர்ன்ஸ்டைன் (Leonard Bernstein) ஒருங்கிணைப்பாளராக மாஹலரின் சிம்பனி 6 இயக்கிய காணொளியை இரவு நேர நிசப்தத்தில் கேட்டுப் பாருங்கள். ஒரு கனத்த சோகம் நம்முள் குடியேறுவதை தடுப்பது கடினம்!

இரா.முருகனின் - லண்டன் டயரி

சமீபத்தில் ஜாலியாக விறுவிறுவென ஜெட் வேகத்தில் படித்த புத்தகம் இரா.முருகனின் ‘லண்டன் டயரி’. ஏதோ ஒரு நூலகத்தில் தன் பக்கத்தில் உட்கார்ந்திருந்த வயோதிகர் பாபரின் சரித்திரத்தை படிப்பதைப் பார்த்த வியப்பு அடங்குவதற்குள், அவரது வாயிலிருந்து வெளிவந்த பா பர்ர் பா பர்ர் எனும் ’சொக்க’வைக்கும் கொர்ர்  ஓசையில் சரித்திரம் எழுதும் ஆசைக்கனவு காத்தாடி போல் ஜிவ்வென அறுந்துப் பறந்ததாக இரா.முருகன் குறிப்பிடுகிறார். விளைவு - லண்டன் உருவான சரித்திரத்தை அதன் போக்கில் நகைச்சுவையாக எழுத முடிந்திருக்கிறது. உட்கார்ந்த இடத்தில் இருந்தபடியே லண்டனை உணரச் செய்கிறது என பின் அட்டையில் எழுதியிருக்கிறது. உண்மைதான். எழுதும்போது எப்படி எழுதினாரோ எனக்குத் தெரியாது;ஆனால் நம்மால் படுத்துக்கொண்டு படிக்க முடியாது. அதே போல் ஏதாவது சாப்பிட்டுக்கொண்டேயும் இப்பஜனை நடக்காது. உட்கார்ந்தபடி மட்டுமே படிக்க இயலும். வயிறு வலிக்கும்படி சிரிப்பதைப் பார்த்து அருகிலிருப்பவர் ‘என்ன சார் படிக்கிறீங்க? ஜோக் புக்கா?’ எனக்கேட்கும்போது ‘சரித்திரம்’ என சொன்னால் அவர் பார்க்கும் பார்வை நம்மை கீழ்ப்பாக்கத்துக் கேஸ் என கன்பர்ம் செய்திருக்கும்.

ஸ்காட்லாந்தில் வேலை செய்தபோது வாரக்கடைசிகளில் லண்டனை சுற்றிப் பார்த்து இந்த டயரியை இரா.முருகன் எழுதியிருக்கிறார். மொத்தம் நூற்றி எண்பது பக்கங்களில் லண்டனின் துவக்க கால சரித்திரம், ரோமானியர்களின் ஆட்சி காலம், விக்டோரியா மகாராணியில் ஆட்சி, லண்டன் நாடக அரங்குகள், வணிக வீதிகளான பிகாடலி, ஈஸ்ட் ஹாம் என பல சரித்திரப் புகழ் பெற்ற இடங்களை அவரது கண்ணோட்டத்தில் விவரிக்கிறார். நகைச்சுவையும் சில நேரங்களில் அங்கத கோணஷ்டைகளும் கலந்த நடை என்பதால் ஒரு குழந்தையைப் போன்ற குதூகலம் நமக்கும் தொற்றிவிடுகிறது. அதன் பிறகு அவர் எது எழுதினாலும் நம்மை சிரிக்க வைத்துவிடுகிறது.

உதாரணத்துக்கு பக்கிங்காம் அரண்மனையைப் பற்றி விவரிக்கும் பத்தி:

அரண்மனைக்குள் எலிசபெத் மகாராணி வயிற்றைத் தடவிக்கொண்டு ஏப்பம் விட்டபடி சாய்வு நாற்காலியில் கால் நீட்டி சிரம பரிகாரம் பண்ணிக்கொண்டிருக்கிறார். ‘காலை சாப்பாட்டிலே சரியா வேகவைக்காத முட்டையைக் கொண்டு போட்டுட்டான் எழவெடுத்த பட்லர். ஒரு டம்ளர் சுடுதண்ணி எடுத்து வாங்க’. உட்கார்ந்தபடிக்கே வீட்டுக்காரர் பிலிப் இளவரசரை ஏவிக்கொண்டிருக்கிறார். தரையில் தவழ்ந்தபடிக்கு எதையோ தேடிக்கொண்டிர்ந்த பிலிப், ‘கிடைச்சுது’ என்ற வெற்றிக் கூச்சலும் தொடர்ந்து மூட்டு வலி முனகலுமாக எழுந்து நிற்கிறார். கையில் ஒரு பவுண்ட் காசு. .. ’நானும் வெளிய போய்க் கம்பிக்கதவைப் பிடிச்சுட்டு கொஞ்சம் நேரம் காத்தாட நிற்கிறேன். அங்கே பாரு, ஒருத்தன் சோடாபுட்டிக் கண்ணாடியும் கட்டை மீசையுமா வாசல்லே எக்கிப் பார்த்துக்கிட்டிருக்கான். போய் நாலு வார்த்தை பேசிட்டு வரேன்’.. நான் அவசரமாக பக்கிங்ஹாம் அரண்மை வாசலை விட்டு நகர்கிறேன்.

இப்படி பல இடங்களைப் பற்றி சுவையான நிகழ்வுகளாக நகர்கிறது இப்புத்தகம். இரா.முருகன் தான் கண்ட இன்றைய லண்டனை விவரித்தது போக, லண்டனின் சரித்திரத்தையும் நடுநடுவே தனி இணைப்புகளாக விவரித்துள்ளார். இதனால், புது இடங்களைப் பற்றிய செய்திகளுக்குப் பின் சரித்திரக் கதைகள் துருத்திக்கொண்டு நிற்கின்றன. சீரான டூரிஸ்ட் கைடு வேகத்தை இது தடுக்கிறது. பாட புத்தகமாக இருக்ககூடாது எனக் கவனமெடுத்து சரித்திரம் சுவாரஸ்யமாக எழுதப்பட்டாலும், புத்தகத்தை முடிக்கும்போது லண்டனின் பழங்கதை முழு சித்திரத்தை தருவதில்லை. இரா.முருகனின் நகைச்சுவையும், நடையும் மட்டுமே எனக்கு ஞாபகத்தில் நின்றது. இது இப்புத்தகத்தின் மிகப் பெரிய பலவீனமாக எனக்குப் பட்டது.

லண்டன் தீ விபத்தைப் பற்றி எழுதப்பட்ட பகுதிகள் மிகவும் சுவாரஸ்யமாக இருக்கின்றன. பெரியளவு இயற்கை சீற்றம் அண்டாமலிருந்தாலும், லண்டனை பிளேக் நோய், தீ விபத்து என பல மனித சேட்டைகளின் சீற்றம் பல காலங்களாக துரத்தியிருக்கிறது. அதில் பெரியது 1666ஆம் ஆண்டு நடந்த தீவிபத்து தான். அதன் நினைவாக தேம்ஸ் நதிக்கரையோரம் ஒரு பெரிய கோபுரம் கட்டப்பட்டது. முன்னூறு சொச்சம் படிகள் ஏறி அக்கோபுரத்தின் உச்சிக்குச் செல்லலாம். அதற்கு டிக்கெட் வாங்கும்போது நடக்கும் சம்பாஷணை -

‘மேலே போகமுடியுமா’ வாசலில் காவலரை விசாரிக்கிறேன். ‘ரெண்டு பவுண்ட் டிக்கட் எடுத்து, முன்னூத்துப் பதினோரு படி ஏறினா, உங்க மாமா பேரு பாப்’ எனச் சொல்லிவிட்டு உரக்கச் சிரிக்கிறார் அவர். அத்தனை படி ஏறி மேலே போனால் என் மாமா பேர் ஏன் திடீர் என மாற வேண்டும் என்ற குழப்பத்தோடு அவரைப் பார்க்கிறேன்.’Bob's your uncle’என்ற பிரிட்டிஷ் சொலவடைக்கு, ‘அம்புட்டுத்தான், ரொம்ப ஈசி’என்ற அர்த்தம் என்று அப்புறம்தான் நினைவு வருகிறது.

அதே போல் பழைய புத்தகக் கடைகள் இருக்கும் ஆக்ஸ்போர்ட் தெரு பற்றி எழுதப்பட்ட பகுதியும் நன்றாக உள்ளது. நிறைய இலங்கைத் தமிழர்கள் மற்றும் இந்திய தமிழர்கள் வாழும் ஈஸ்ட் ஹாம் பகுதி, ஸ்ட்ராண்ட் எனும் பழைய இலக்கிய முட்டுச் சந்து, பல நாடக அரங்கங்கள் என இன்றைய லண்டனின் முக்கியமான பல இடங்கள் இப்புத்தகத்தில் இடம்பெற்றுள்ளன. இவ்விடங்களின் சரித்திரங்கள் ஆங்காங்கே சொல்லப்படாமல், சம்பவங்களாக மட்டுமே நினைவில் நிற்கின்றன. (முன்னர் யானி புத்தகத்திலும் இதே போன்ற குறை இருந்தது. சம்பவங்களை நாடகத்தன்மையுடம் சொன்னால் சுவாரஸ்யமாக இருக்கும் தான். ஆனால், அதில் விஷயம் நிறைய சேர்க்காவிட்டால் அபுனைவிலிருந்து கிடைக்கும் விஷய ஞானம் குறைபட்டுவிடும் என நான் நினைக்கிறேன்.)

‘காந்திக்குப் பிறகான இந்தியா’ (India After Gandhi), சென்னை மறுகண்டுபிடிப்பு போன்ற ஆழமான சரித்திர புத்தகங்களை கிழக்கு வெளியிட்டுள்ளது. ஆனால் இப்புத்தகமோ சரித்திரம், நாட்குறிப்புகள், பயணநூல் போன்ற எந்த பகுப்பிலும் சேரவில்லை. இப்படி கலந்துகட்டி இருப்பதால் இப்புத்தகம் மிகவும் பலவீனமாகி படிப்பவர்களின் நினைவில் நிற்காமல் போகும் வாய்ப்பு உள்ளது. இரா.முருகனின் ஜாலி நடைக்காகப் படிக்கலாம். மற்றபடி இப்புத்தகத்தை முடிக்கும்போதும், மறுபடியும் ஒருசேர தொகுத்துப் பார்க்கையில் லண்டனின் சரித்திரம் அவ்வளவாக நினைவில் தங்கவில்லை. ஒரு ஊரைப் பற்றிய ஜாலியான தீற்றல் குறிப்புகளாக மட்டுமே இப்புத்தகம் நின்றுவிடுகிறது.

From East With Glory - சிறுகதை

லண்டனின் நியூஹாம் (Newham) சிறுகதைப் போட்டியில் நான் எழுதிய From East With Glory என்ற கதை கடைசி சுற்றுக்குத் தேர்வாகியிருக்கிறது என்பதை குஜாலுடன் தெரிவிக்கிறேன்.

இதில் இருக்கும் கவிதை, கதை மற்றும் நாடகம் கடைசி சுற்றில் தேர்வானவை மட்டுமே. செப்டம்பர் மாதம் 12ஆம் தேதி முடிவுகள் கிழக்கு லண்டனில் இருக்கும் ஸ்ட்ராட்ஃபோர்ட் நூலகத்தில் ஒரு விழாவாக அறிவிக்கப்படும்.

Update:

From East with Glory

லண்டன் காலா பந்தர் - சில உள்நாட்டு பந்தர்களும்

டெல்லி-6 படத்தில் வந்த கருப்பு குரங்கு (படத்தில் 'காலா பந்தர்`) , அபிஷேக் இல்லை, ஆட்டத்தில் தில்லி கலங்கியது போல் லண்டனிலும் நடந்துள்ளது. நம் தலைநகரமே காலா பந்தர்களின் அணிவகுப்புதானே போன்ற விவகாரங்களுக்குள் நுழையாமல் , சொல்ல வந்த கதை இதோ.

இந்த ஹீரோவின் பெயர் Spring-heeled Jack என்று பெயர். அதாவது இவனுக்கு குதிப்பதற்காக மட்டுமே கால்களுண்டு. சும்மா எல்லார்மேலேயும் குதிக்காமல், இளைஞிகளைப் குறி பார்த்து குதித்து வந்தான். 1838 களில் சின்ன பெண்களின் மேல் விழுந்து பயமுறுத்துவது இவன் வேலை.ஸ்பெஷாலிடி - மறைந்து தாக்குவது, குறிப்பாக வேலைக்குப் போகும் இளம் பெண்களை. அவன் சில்மிஷம் செய்தவர்கள் கொடுத்த விவரணையின்படி - இரும்பு பிடியும், ஐஸ் போன்ற கை நகங்களையும், நெருப்பு போன்ற கண்களுடன் வலம் வந்துகொண்டிருந்தான். Duke of London என்ற தலை, சொம்பு,ஆலமரம் இத்தியாதியில்லாத பஞ்சாயத்தில் ,பொது மக்கள் தங்கள் விருப்பப்படி துப்பாக்கி உபயோகிக்கலாம் என்று தாராளமயமாக்கினார். இதற்கு முன்னுதாரணமாக தானே Wild Wild West போல துப்பாக்கியுடன் குதிரையில் லண்டன் முழுவதும் வலம் வந்திருக்கிறார்.

1870 களின் பனிக் காலம். நம் குதியாட்ட மனிதன் நடமாட்டம் தாங்க முடியாமலே போய்விட்டது. பல வீடுகளில் பனிமழையோ என சந்தேகிக்கும் அளவிற்கு தப தபவென ஓடு விட்டு ஓடு தாண்டத்தொடங்கினான். வெல்லிங்டன் என்ற இடத்தில் அப்படி தாண்டும்போது ,பந்தய குதிரைபோல் இடரி அருகிலிருந்த குட்டைக்குள் விழுந்துவிட்டான். அவனை அப்புறப்படுத்த பயந்து ஒரு நாள் தூங்காமல் காத்துக்கிடந்த பொதுஜனம், காலையில் குட்டையில் அவன் சட்டையை மட்டும் கண்டு பீதியானது.

அத்துடன் Spring heeled Jack கதை முடிந்தது என்றே நினைக்கிறார்கள். இது Jack the Ripper என அசுர வில்லன் வரும் வரையிலேயே.

இதைப்போன்ற `காலா பந்தர்களால்` என்ன பயன் இருக்கும். அரசியல் பானங்களைப் போல மின்னலென வந்தாலும் பயமே இவர்களின் வெற்றி எனத் தோன்றுகிறது. ஜனங்கள் பயப்படாத போதுதான் காலா பந்தர்களால் பெரிய ஆபத்துண்டு.

இதைப்போன்ற காலா பந்தர்கள் நம் தமிழ் பிளாக்கர்கள் மத்தியில் உளவினால் என்ன ஆகும்? இப்போதே கொளுத்திப்போட பலதுகள் காத்துக்கிடந்தாலும், நம் தமிழ் இணையத்தில் சில விஷயங்களைப் பேசினால் சுலபமாக மடக்கிவிடலாம்.

தமிழ் பண்பாடு, இந்திய வரலாறு, கலாசாரம் என்போரிடம் - காந்தி, நேரு போல் நீயும் நாட்டைக் கெடுக்க வந்தவன் எனலாம்.

கோவில், புராணம், தெய்வீகம் என எழுதுவோரை  - உன்னைப்போன்றவர்களால் தான் தீண்டாமையே துடங்கியது. வெங்காயம் எனலாம்.

நான் எதிலும் சாராதவன், எல்லாமே எனக்கு சம்மதம் என்போரை - கமலஹாசன், மணிரத்னம் பிடிக்கும் என்றாயே. hypocrite எனலாம்.

பழைய எழுத்தாளர்களின் எலிக்குஞ்சுகளை , Foucault , Derrida என மிரட்டலாம். இதற்கும் ரஜினி `லகலகலக` என சொல்லி பயமுறுத்துவதற்கும் எந்த வித்தியாசமும் கிடையாது.

கவிதை எழுதுபோரை - ஹைக்கூ, பொய்க்கூ எனச் சொல்லி கும்மியடிக்கலாம்.

கருணாநிதி, ஜெயலலிதா என மேல் பட்டன் கிழிய சண்டையிடுவோரை , பொழப்பை பார்க்கச் சொல்லலாம்.

பெண் பிளாகர்களுக்கு - இருக்கவே இருக்கிறது ` பின் இரவில் குமட்டில் தொடுகை`  போன்ற `அப்படியாகப்பட்ட` கதை எழுதி நிர்கதியடையலாம்!

உமாச்சி பற்றி எழுதுவோரை - பார்பனீய சவுக்கால் பின்னிப் பெடலெடுக்கலாம்

Spring heeled Jack போல் லிங்கு தாவும் ஜந்துக்களால் பல பிரச்சனைகளை உண்டுபண்ணலாமே!

பா.ராகவனின் 'ரெண்டு' - புத்தக விமர்சனம்

வெளிவந்த சில நாட்களிலேயே படித்த புத்தகம் 'ரெண்டு'. பா.ராகவனின் முத்திரை புத்தகம். அவர் எழுத்துகளுக்குள் முதல் முறை வருபவர்கள் இந்த புத்தகத்திலிருந்து ஆரம்பிக்கலாம்.

வெளியீடு - கிழக்கு பதிப்பகம்

போன ஞாயிறு அன்று வழக்கம்போல நியூஹாம் நூலகத்தில் சுற்றிக் கொண்டிருந்தேன். கிழக்கு லண்டனில் புகழ்பெற்ற நூலகம். வாராவாரம் தவறாமல் சென்றாலும் குறைந்தது மூன்று மணிநேரமாவது செலவுசெய்யாமல் வரமாட்டேன். லண்டனில் எங்கே அதிகமாக போயிருக்கீங்க என யாராவது கேட்டால், நியூஹாம் நூலகம் என சொல்வதுதான் உண்மையாக இருக்கும்.இத்தனைக்கும் அது ஒன்றும் பெரிய நூலகம் இல்லை. சென்னை அமெரிக்கன் நூலகத்தை விட சின்னது.இரண்டே மாடிகள்.கீழே Quick Picks மற்றும் இசை ஆல்பங்கள், முதல்மாடியில் புனைவு/அபுனைவு நூல்கள். இங்கே தமிழ்,மலையாளம்,ஹிந்தி முதல் அத்தனை ஐரோப்பிய மொழி புத்தகங்களும் இருக்கிறது.

பொதுவாகவே தமிழில் பயமுறுத்தும் இந்திரா செளந்தர்ராஜன், பிழிய வைக்கும் லஷ்மி/அனுராதா ரமணன், மற்றும் ஆடிக்கொருதடவை சுஜாதா,நாஞ்சில் நாடன், சுந்தர ராமசாமி போன்ற புத்தகங்கள் வரும். என்னிடம் அதை விட அதிகமான புத்தகங்கள் இங்கேயே இருக்கிறது.மனைவி முறைத்ததால் இப்போது வாங்குவதை குறைத்துள்ளேன்; மேலும் எப்படியும் இந்தியா வரும்போது அதை என்ன செய்வது. கடல் கடந்து வந்த புத்தகங்கள்;கண்டிப்பாக மறுபடியும் படிக்கவேண்டியவை.

அதனாலேயே முதல் தளத்தில் தமிழ் பக்கம் கரம் சிரம் அகம் நீட்டாமலிருந்தேன். கடந்த ஞாயிற்றுக்கிழமை நடுத்தர வயதான ஒரு இலங்கை தமிழர் - பாவம் யாரோ அவரிடம் இங்கே First Class தமிழ் புத்தகங்கள் கிடைக்குமென வழி சொல்லியிருக்கிறார்கள் - தமிழ் புத்தக பகுதிக்கு வழி கேட்டார். வந்தாருக்கு வழி சொல்லும் லாங்குவேஜில் பேசியதால் கை பிடிக்காத குறையாய் கூட்டிக் கொண்டுபோனேன். பார்த்தால் இரண்டு 'ரெண்டு' புத்தகத்தின் காப்பிகள், மணக்க மணக்க புது புத்தகங்களுடன் இருந்தது. படித்து பல வருடங்கள் ஆனாலும், சுவையான புத்தகம் என தெரிந்ததால்  எடுத்துக்கொண்டு ,அந்தப் பெரியவருக்கும் அந்த புத்தகத்தை சிபாரிசு செய்தேன். அவர் கூடவே ரமணிசந்திரன் புத்தகம் இரண்டையும் எடுத்துக்கொண்டார்.

Fast Forward >> அந்த இலங்கை பெரியவர் இப்போது:

அ) என்னைத் திட்டிக்கொண்ட்டிருக்கக் கூடும்.

ஆ) தன் மனைவி/மகளிடம் தர்ம அடி வாங்கிக் கொண்டிருக்ககூடும் ('பாவம் ,சும்மா வீட்ல இருக்கியே, புக்கு படிச்சா பொழுது போகும்னு பார்த்தா-முதல் தடவையே என்ன மாதிரி எடுத்து வந்திருக்கே! எவன் உனக்கு எடுத்துக்கொடுத்தது')

தப்பா நினைக்க வேண்டாம். இது பா.ராகவனின் தவறல்ல. புத்தகத்திற்கு வெளியே அட்டையில் சிறு தாளில் ஒட்டியிருந்த வாசகம் யாரையும் தொடப்பம் எடுக்க வைக்கும். அங்கே நூலகத்தில் Text என்ற பகுதியில் ஒட்டியிருந்தது - "living together with 2  concubines without marrying in Indian society" - இதை எங்கேயிருந்து உருவினார்கள் எனத் தெரியவில்லை. ஒரே வில்லங்கம் பிடித்த வாசகம் - தப்பும் தவறுமாக Synopsis உடன் வெளிவந்திருக்கிறது - அந்தப் பெரியவர் என்ன நினைத்தாரோ என்னைப் பற்றி.அடுத்த முறை பின்வாசல் வழிதான் நமக்கு.

கதை சிம்பிள்.அவந்திகா,மனோஜ்,விக்டர் மூவரும் ஒரெ பல்கலைகழகத்தில் சமூகவியல் ஆசிரியர்கள்.சோறு போடும் தொழிலையே,தங்கள் வாழ்விலும்,எண்ணங்களிலும் உண்மையென நம்பி தங்கள் மனசாட்சிபடி,சமூகத்தின் அசட்டு நம்பிக்கைகளை விட்டொழிக்கும் மனோபாவமுடையவர்கள். காதலா, நட்பா போன்ற குழப்பங்கள் இல்லாமல், உணர்வுகளின் அடிப்படையில் மூவரும் சேர்ந்து வாழத் தொடங்குகிறார்கள். சுற்று வட்டாரத்திடமிருந்து வரும் கேள்விகளை - தங்கள் மேதாவிலசத்தாலும், அகந்தையாலும், தங்களுக்குள் இருக்கும் அன்பு எனும் உணர்வின் மேலுள்ள தீவிர நம்பிக்கையினாலும் - சுலபமாக எதிர்கொண்டு பதில் சொல்லிவிடுகிறார்கள். எல்லாவற்றையும் முன்னமே முடிவு செய்திருந்தாலும், தங்களுக்குள் உருவாகும் சுலபமான கேள்வியை எதிர்பார்க்காமல் குழம்பி,தவித்து படும் தொல்லைகளே மீதி கதை.

புத்தகத்தில் பிடித்தவை:

1. எடுத்துக்கொண்ட கருவின் சாமர்த்தியம் - மிக டிராமாத்தனமாக செல்ல வேண்டிய கதையை, சுவாரசியமாக எடுத்துச்செல்லும் விதம்.

2. பா.ராவின் நடை.நடை.மேலும் நடை.

 அற்புதமான விவரிப்புகளையும், இயல்பாக கூறி, அடுத்த வரி தனியாக நிற்காமல் பார்த்துக் கொள்வதில் சமர்த்தர். சில உதாரணங்கள் -

    'போராளிகள் புல் பிடுங்கிக்கொண்டிருந்தார்கள்'
    'காலம் - விளக்கடியில் பூச்சிக்குக் காத்திருக்கும் பல்லி போல கண் இரண்டையும் திறந்துவைத்துக்கொண்டு பிணம்போல் கிடக்கிற ஜாதியல்லவா அது?'
    'நகர்வது தெரியாமல் நகர்வதில் பூமியை மட்டுமே அதற்கு நிகராகச் சொல்ல வேண்டும்'
    'உறவுகள் என்ன ஆணுறை போன்றவையா? நினைத்த மாத்திரத்தில் மாட்டிக் கொள்வதற்கும், எடுத்து வீடுவதற்கும்'

3.மனோஜ் முடிவில் நடந்து கொண்ட விதம் - typical realism - என்பதற்கு உதாரணம்.

சில கேள்விகள்:

1 இந்த மூவரில் மனோஜ், விக்டர் - இருவர் பாத்திர படைப்பில் மட்டுமே நேர்மை , காரணமிருக்கிறது:

    அ. மரபு, பச்சாம்பசலித்தனம், சமூக முரண்கள் - இந்த மூன்றும் அவர்கள் வாழ்க்கையிலேயே சிதறியதால் இவற்றை வெறுக்கிறார்கள்.
    ஆ. மனோஜுக்கு - சமூகம் தன்னை ஒதுக்கியதாலும், மீண்டு எழ வேண்டுமென வெறியினாலும் இந்த மரபு எதிர்ப்பு ஏற்பட வாய்ப்புண்டு.
    இ. விக்டருக்கு - தன் அம்மா தன்னை தனியே விட்டுவிட்டு, உடற்தேவைக்காக வேறொருவரை மணந்து கொண்ட வெறுப்பு , சமூக முரண் மற்றும் பாதுகாப்பற்ற தன்மை வரக் காரணமாகலாம்.
    ஈ. அவந்திகாவிற்கு சிந்தனை தவறுவதற்கும், மரபை மீறுவதற்கும் காரணமே இல்லை. படிப்பு,சிந்திப்பது இவை காரணமல்ல. புரிந்து கொள்கிற தாய், சுதந்திரத்தை மதிக்கும் தந்தை - என வாழ்க்கையில் நடந்ததை காரணமாக காட்டிகிறார்கள்.
இதனாலேயே இந்த பாத்திரம் வலு இல்லாமல் இருக்கிறது - தூக்கி நிறுத்துவது பா.ராவின் நடை மட்டுமே.

2. Initial போட்டு பிரச்சனையைத் தொடங்காமல், குழந்தை கவிதாவின் தினப்படி வாழ்க்கையில் இந்த முக்கோண உறவு உருவாக்கும் குழப்பங்கள், அதை சமாளிக்க முடியாமல் அவள் கிளப்பும் பூதங்கள் என காட்டியிருந்தால் உண்மைக்கு நெருக்கமாக இருந்திருக்குமா?

3. திடீரென மூவருக்குள் சண்டை வருவதுபோல் உள்ளது; எல்லாவற்றையும் தூக்கிப் போட முடிந்த அவர்களால், பழமைக்கும் பச்சாம்பசலித்தனத்திற்கும் எதிராக இருக்கும் அவர்களால் - எப்படி Initialஐ போட முடியாமல் போனது - குறிப்பாக விக்டருக்கும்,மனோஜுக்கும்? (ஏன் என்று அடுத்த சில வரிகளில் சொல்கிறேன்)

4.ஆரம்பத்தில் எனக்குத் தோன்றியது இதுதான் - இவர்களுக்குள் பிரச்சனை வந்தால் சில்லரைத்தனமாக இருக்குமே?
 குழந்தைக்கே இந்த உறவின் குழப்பங்கள் மிகுந்த சிரமத்தை கொடுத்திருக்கும்.

5. முதல் அத்தியாத்தில் கடைசி வரை கதையை விவரிப்பது ஒரு பெண் எனத் தெரியவேயில்லை. இது ஒரு குறையா எனக் கேட்கலாம். ஆனாலும் முதலில் அவந்திகாவின் பாத்திர படைப்பில் பெண்ணாக உருவகப்படுத்த ஆசிரியர் முயற்சி செய்ததாகவே தெரியவில்லை. இதனாலேயே அவந்திகாவின் குரல் பா.ராவாகவே ஒலிக்கிறது - புத்தகம் முழுவதும். படிக்கும்போதும், படித்த பின்னும் எனக்குப் முதலில் தோன்றியது இது.

6. தங்கள் அறிவு மண்டியிடும் இடங்கள் என ஒவ்வொறு அத்தியாயத்திலும் சில விளக்கங்கள் வருகிறது. சரணாகதி வேண்டாம். குறைந்தபட்சம் தங்களால் சமாளிக்க முடியாத குழப்பங்கள் வரும் எனத் தெரியாமலா இருப்பார்கள். அல்லது சமாளிக்க முடியாத பிரச்சனைகளே இவர்கள் எதிர்கொண்டதில்லையா? - இது எனக்குப் புரியவில்லை.

Noise of Art - லண்டன் நிகழ்ச்சி.

NoiseOfArt இன் இந்த வருட லண்டன் நிகழ்ச்சி இன்று SouthbankCentreஇல் ஆரம்பிக்கிறது.முக்கியமாக LES HOMMES DU TRAINஇன் முதல் நிகழ்ச்சி.